Thaçi, në Nju Jork për debatin në KS

Sekretari i përgjithshëm Ban Ki Moon do të prezantojë raportin më të ri për Kosovën të hënën. Ai pritet t’i rekomandojë bashkësisë ndërkombëtare që të vazhdojë mbështetjen për procesin e dialogut Kosovë-Serbi, të ndërmjetësuar nga BE.

Lajmin për vajtjen në Nju Jork kryeministri e publikoi në Facebook. Në postimin për këtë çështje, ai bëri edhe një koment për terminalin e ri të aeroportit ndërkombëtar të Prishtinës “Adem Jashari”.

“Sa herë që udhëtoj jashtë atdheut kënaqem duke parë aeroportin tonë të ri e modern, i cili nuk i lë gjë manugt aeroporteve më të mirë në këtë pjesë të botës”, shkruan Thaçi.

“Sot, afro 2 milionë udhëtarë përdorin aeroportin tonë, ndërsa në vitet e ardhshme ky numër do të zgjerohet në 5 milionë”, vijon postimi i kryeministrit.

Ndërkohë, burime qeveritare bëjnë të ditur se pas Nju Jorkut kryeministri Thaçi do të udhëtojë drejt Brukselit për të marrë pjesë në takimin e radhës me homologun e tij serb Ivica Daçiç.

Takimi Thaçi-Daçiç është caktuar të mbahet më 12 shkurt dhe temë diskutimi do të jetë funksionimi i gjykatave dhe policisë në veri, vazhdim i bisedës nga takimi paraprak, pasi palët nuk arritën të pajtoheshin plotësisht.

Top Channel