Kampionët në fuqi të Kupës së Mbretit, Atletico Madrid, siguruan kalimin në gjysmëfinale të kompeticionit, ku do të përballen me rivalët e betuar të Realit të Madridit, pasi mposhtën me përmbysje Athletic Bilbao 2-1, duke e çuar rezultatin e përgjithshëm në 3-1 në favor të tyre.
Edhe Barcelona preu biletën për një vend në 4 më të mirët e trofeut të dytë për nga rëndësia në Spanjë, pas fitores 5-1 ndaj Levantes në “Camp Nou”, por rezultati i përgjithshëm për katalanasit është edhe më i thellë, 9-2.
Në Bilbao, Aritz Aduriz kaloi në avantazh vendasit 4 minuta nga fundi i pjesës së parë, ndërkohë që në dy raste të tjera të pastra për shënim, pengesa e vetme mbante emrin Thibaut Courtois.
Gjithsesi, Atletico zbriti në pjesën e dytë me më shumë vendosmëri, duke barazuar rezultatin 10 minuta pas rifillimit të lojës, kur Raul Garcia ktheu në gol, krosimin e dhënë nga Emiliano Insua.
Diego Costa siguroi kalimin për më tej të madrilenëve, duke shënuar kështu golin e tij të parë për vitin 2014, pas një kundërsulmi. Kjo ishte humbja e parë për Athletic Bilbao në fushën e tyre, “San Mames”, stadium të cilin kanë nisur ta përdorin që nga fillimi i këtij sezoni.
Atletico do të udhëtojë drejt “Santiago Bernabeu”-t, ku vitin e kaluar mposhtën 2-1 Realin në finalen e kompeticionit, ndërsa këtë vit do të zhvillojnë takimin e parë për gjysmëfinalet, ndërkohë që takimi i kthimit do të jetë në “Vicente Calderon”, një javë më pas.
Ekipi i drejtuar nga Simeone do të përballet me Realin 3 herë gjatë këtyre 3 javëve, për kampionat dhe kupë, e megjithatë ata janë të pamposhtur në 4 takimet e fundit kundër “Los Blancos” dhe Barcelonës këtë sezon, duke u shpallur luftë kompetitive dy gjigantëve spanjollë.
Ndërkohë, kalimi i Barcelonës për në gjysmëfinale ishte disi më i lehtë, pasi shpartalluan Levanten në “Camp Nou” 5-1. Fillimisht takimi nisi me një autogol të Sergi Roberto-s, por asnjë shpresë më tej për miqtë për të përmbysur humbjen e parë 4-1.
Më pas, Adriano me një gjuajtje nga distanca dhe Carles Puyol me kokë rikthyen katalanasit në avantazh brenda pjesës së parë. Në të dytën, dy golat e Alexis Sanchez e çuan rezultatin në 4-1, ndërkohë që mbylli gjithçka Cesc Fabregas, 21 minuta nga fundi i takimit.
Top Channel
