Efektet pozitive të kafesë

“Është një nga pijet që ka vlerat më të mëdha ushqyese dhe mos harrojmë që është një produkt natyral. Midis benefiteve më të mëdha është ai i parandalimit të diabetit të llojit të dytë, fenomen i vërejtur nga shkencëtarët tek personat që kanë një konsum të moderuar të kafesë. Gjithashtu, kafeja shihet si parandaluese edhe e sëmundjeve kronike të moshës së tretë, midis tyre parkinsoni apo alzheimeri”, deklaroi dietologia për “Pasdite” në “TCH”.

Pija e lashtë u  vjen në ndihmë edhe personave që në përiudha të caktuara kanë shumë ngarkesë.

“Ka shumë njerëz që e kanë të domosdoshme kafenë për mënyrën e tyre të punës, pasi kafeina stimulon përqendrim më të madh dhe i bën njerëzit më produktivë, në një kohë më të shkurtër. Ka shumë profesione të tjera, si shofer apo që përfshijnë punën në turnin e tretë, në të cilët kafeina luan gjithashtu një rol stimulues”, shtoi dietologia.

Por, si me çdo gjë duhet pasur kujdes për të mos kaluar caqet. “Një person duhet të konsumojë 2-3 kafe mesatarisht, por varet edhe prej metabolizmit, për shkak të aritmive apo sëmundjeve të zemrës që lidhen me konsumin e kafesë. Megjithatë, dua të them se nuk ka asnjë provë shkencore që të lidhë hipertensionin, me konsumin e kafesë”, theksoi zonja Naço.  

Nga ana tjeter, kafeja i pakëson lëngjet që kemi në organizëm. Ndaj gjithmonë mos harroni, filxhanin e kafesë ta shoqëroni me një gotë ujë.

Top Channel