Canta luksoze nga gomat e makinave

Ky person është tipizimi i denjë i njeriut fjalëpak e mendjendritur. Ky është Arben Pëllumbi, një 42-vjeçar që jeton në fshatin Halil të Fushë-Krujës. Është mësuar që në vogëli të jetojë me punën dhe rrethanat jetësore e kanë shtyrë të krijojë e të shpikë në pamundësi për të pasur gjithçka për shkak të kushteve ekonomike.

Me këtë frymë ia ka mbërritur edhe sot. Ai ka ndërtuar një punishte artizanati ku gjithçka që i sheh syri, ia bën dora. Por, mjeshtëria e tij që e veçon nga të tjerët janë riciklimi i gomave të makinës. Ai ka zbuluar dhe ndërtuar vetë një mekanizëm për rrjepjen e tyre.

Dhe me lëkurat që nxjerr, prodhon gjithëfarë sendesh. Por, kërkesat në tregun e huaj janë orientuar më së shumti drejt kësaj çante gome. Një prodhim artizanal shumë unik dhe që Benit ia kanë vlerësuar shumë.

Arbeni krijon gjithçka, që nga lënda e parë që përpunohet prej tij e deri tek perçinat, apo mbërthesat e çantës.

“Puna është shumë e vështirë, por të paktën ka cilësi”, thotë Arbeni.

Me këtë punë Arbeni nxjerr të ardhurat e vetme në shtëpinë e tij prej 4 anëtarësh. E vetmja mundësi punësimi edhe për bashkëshorten e tij Manjolën, e cila ia ka marrë dorën disa proceseve, duke lehtësuar disi punën e bashkëshortit: “Vetëm për ta qepur do dy ditë çanta.”

Pas gomës, vendin e zënë çantat e shajakut. Janë edhe këto sende që preferohen shumë dhe artizani i prodhon më së shumti për t’i eksportuar jashtë. Janë të gjitha, nga A-ja tek ZH-ja, punime dore.

Arbeni është tejet modest për punën që bën. Ai as që arrin ta përfytyrojë sesa shumë vlerësohet një çantë e tij jashtë. Kënaqet me faktin që dikush diku i adhuron punimet e tij.

“Mua më pëlqen fakti që puna ime pëlqehet nga ai që e shikon.”

Top Channel