Raportuesit për Shqipërinë në Asamblenë Parlamentare të Këshillit të
Europës do të vizitojnë Tiranën gjatë javës së parë të Dhjetorit, për të
ndjekur në terren përmbushjen e angazhimeve dhe detyrimeve nga vendi.
Britaniku Jonathan Evans dhe Grigore Petrenco nga Moldavia pritet të zhvillojnë takime me Kryeministrin, Ministrin e Brendshëm dhe atë për autoritetet lokale e decentralizimin, kreun e opozitës, përfaqësuesit e Kuvendit në Strasburg, Avokatin e Popullit, përfaqësuesë të gjyqsorit, KQZ-së, shoqërisë civile dhe të trupit diplomatik.
Sipas njoftimit për shtyp, diskutimet do të fokusohen në bashkëpunimin qeveri-opozitë, pavarësinë e gjyqsorit, depolitizimin e administratës, në luftën ndaj korrupsionit, mbrojtjen e të drejtave të njeriut, përfshirë zbatimin e vendimeve të Gjykatës për të Drejtat e Njeriut ndaj Shqipërisë. Gjatë vizitës së tyre, 1-5 dhjetor, raportuesit do të vizitojnë dhe burgun e Vlorës, e do të takohen me përfaqësuesë lokal të këtij qyteti, dhe ditën e fundit do të mbajnë një konferencë për shtyp në Tiranë.
Top Channel
