De Biasi rrit çmimin

Edhe pse shpreh vullnetin për të vazhduar dhe thekson edhe vullnetin e presidentit Duka, të pakta janë detajet që trajneri italian thotë, megjithatë nuk lë pa ushtruar tërthorazi presion, me ofertat qe i kanë ardhur ndërkohë.

“Po ua them pa më pyetur ju. Kam shprehur me kohë vullnetin për të lidhur me Federatën edhe një kontratë tjetër dy-vjeçare, por ndërkohë kam pasur edhe disa oferta të tjera, duke qenë se disa ekipe shohin që kontrata ime aktuale është drejt skadimit”, deklaroi De Biasi.

Në fakt e vërteta është disi më ndryshe. Gianni De Biasi i ka kërkur Federatës Shqiptare të Futbollit një rritje prej 30% të kontratës, krahasuar me atë që ka firmosur dy vite më parë.

Në total, kjo rritje shkon në 1 mln e 35 mijë euro bashkë me stafin, një shifër jashtë normales për një Federatë të vogël si e jona.

 Ndërkohë, presidenti Duka, pavarësisht hubjeve të fundit, pasi oferta ka qenë e tillë përpara ndeshjeve me Slloveninë dhe Islandën, i ka qëndruar ofertës së parë, një rritje prej 10% që do të ishte diçka më e pranueshme për ne.

Sigurisht që janë 20% diferencë mes ofertës dhe kërkesës që për ne janë shumë, ndoshta për De Biasin janë normale. Një gjë të tillë e konfirmon edhe menaxheri i kombëtares Alban Bushi.

“Dëshira jonë është që trajneri të vazhdojë akoma me ne. Presidenti ka bërë publike ofertën e tij dhe edhe trajneri ka bërë të tijën. Ne s’kemi mundësi shumë të mëdha pasi jemi një Federatë e vogël, megjithatë do të shohim. Në këtë moment, të gjitha mundësitë janë të hapur”, u shpreh Bushi.

Top Channel