Tregtia e jashtme në Kosovë

Eksporti mbulon importin vetëm me 10%. Ndërkohë që vihet re se përqindja më e madhe e eksportit ishte me Shqipërinë rreth 16%, me Italinë 15%, Indinë 11%, Maqedoninë 10%, Serbinë 7% dhe Malin e Zi 6%.

Ndërsa përsa i përket importit, në krye renditet Serbia me 12%, Italia me rreth 10%, Gjermania 9%, Maqedonia 8%, Turqia 6% dhe Kina 6%.

Në shifra të përgjithshme eksporti në muajin gusht 2013 kapi vlerën 23 milionë euro, ndërsa importi 228 milionë euro. Kjo tregon një rritje prej 11% për eksport, si dhe një rënie prej 5% për import, krahasuar me periudhën e njëjtë të vitit 2012, njofton ASK.

Sipas të dhënave të grupeve kryesore të eksportit: 42% të eksportit e përbëjnë metalet bazë dhe artikujt prej tyre; 15% produktet minerale; rreth 9% produktet bimore; 8% ushqimet e përgatitura, pijet dhe duhani; 8% plastika, goma dhe artikujt prej tyre; 5% tekstili dhe artikujt e tij, etj.

Ndërsa, sipas të dhënave të grupeve kryesore për import: 24% të importit e përbëjnë produktet minerale; 15% ushqimet e përgatitura, pijet dhe duhani; 10% metalet bazë dhe artikujt prej tyre; 8% makineritë, pajisjet mekanike dhe elektrike; 6% plastika, goma dhe artikujt prej tyre; 6% produktet e industrisë kimike, etj.

Partnerët kryesorë tregtarë sa i përket  eksportit dhe importit në Kosovë, në raport me totalin e muajit, janë vendet e BE-së, të cilat marrin pjesë me 40% për eksport dhe 42% për import. Ndërsa vendet e CEFTA-së marrin pjesë me 41% për eksport dhe 32% për import.

Top Channel