Bie fluksi i pushuesve në Shqipëri

Referuar me të njëjtin hark kohor të vitit të kaluar, raportohet se për qershor-korrik 2013 kanë hyrë gati 100 mijë më pak shtetas shqiptarë, nëpërmjet pesë pikave kufitare më të mëdha në vend.

Ndërsa për të njëjtën periudhë, të dhënat e policisë tregojnë se në Shqipëri kanë hyrë gati 650 mijë shtetas shqiptarë, për këtë vit trendi është në ulje, me një shifër prej 505 mijë e 773 shtetas shqiptarë.

I pyetur për këtë trend, shefi i qendrës operative të Departamentit të Kufirit dhe Migracionit, kryekomisar Bilbil Dervishi shpjegon: Ka një trend në ulje, por nuk është e madhe. Ne presim që kur të marrin pushimet të vijnë më shumë, pra gushtin e parashikojmë me fluks.

Referuar të njëjtave statistika, ulje shënohet edhe për hyrjet në Shqipëri të shtetasve të huaj, pavarësisht se vendin e parë të shtetasve, që preferojnë të kalojnë verën në Shqipëri, e zënë kosovarët.

Konkretisht, nga pothuajse 600 mijë shtetas të huaj, që kanë hyrë për qershor-korrik 2012 në Shqipëri, gati 480 mijë prej tyre raportohen të kenë hyrë nga pika kufitare e Morinës.

Ndërkohë që, panorama për shtetasit e huaj, ku policia radhit edhe shqiptarët e Kosovës, është e tillë për këtë vit, me një shifër hyrjesh prej rreth 470 mijë personash, prej të cilëve 290 mijë mendohen të jenë kosovarë, që kanë hyrë po nga Morina.

E vetmja pikë kufitare, që raportohet të ketë ruajtur të njëjtin nivel hyrjesh, është pika e kalimit kufitar në Qafë Thanë, si dhe Kapshtica deri diku.

Top Channel