San Diego, kreu i bashkisë, një maniak

Shtatë gra kanë akuzuar tashmë Bob Filner, 70 vjeç, për ofensiva të padëshirueshme, disa prej të cilave edhe fizike. Komiteti lokal Demokratik votoi 34 pro e 6 kundër, të enjten, për largimin e liderit të qytetit të 8-të më të madh të kombit.

Në një konferencë për shtyp, Filner tha se sjellja e tij ka qenë “e pafalshme”, por nuk deklaroi dorëheqjen nga posti. “Kam kërkuar falje ndaj stafit tim, u kam kërkuar falje grave që kam ofenduar”, tha 70-vjeçari i divorcuar gjatë së premtes.

Ish-kongresmeni vazhdoi më tej: “Jam i përgjegjshëm për sjelljen time dhe mund të marr përgjegjësi për to, duke ndërmarrë veprime, që gjëra të tilla të mos ndodhin më. Kështu, duke nisur nga 5 gushti, do të futem në një klinikë rehabilituese, për t’iu nënshtruar një terapie intensive 2-javore, në mënyrë që të gjej një zgjidhje për sjelljen time”.

Problemet e Filner nisën 2 javë më parë, kur Donna Frye, një ish-këshilltare dhe dikur mbështetëse e tij, bëri thirrje për shkarkimin e tij, duke thënë se kishte prova të mjaftueshme, që ai kishte ngacmuar seksualisht disa gra.

Ai iu përgjigj me një falje përmes një videoje, duke e quajtur sjelljen e tij “të papërshtatshme dhe të gabuar” dhe duke deklaruar se “kam nevojë për ndihmë”.

Më pas, të hënën, ish-drejtoresha e komunikimeve të Filner-it, Irene McCormack Jackson, ngriti një padi ndaj tij dhe ndaj qytetit.

Ai akuzonte se ai i kishte kërkuar të punonte pa të brendshmet, se i kishte thënë që donte ta shihte të zhveshur dhe se e kishte frenuar atë duke e kapur prej krahu, duke bërë avancime të padëshirueshme.

Të enjten në mbrëmje, 4 gra të San Diego-s dolën publikisht me akuzat e tyre të detajuara, në një kanal televiziv lokal.

Votimi i parë për shkarkimin e Filner, javën e kaluar, nga Komiteti Qendror i Partisë Demokratike të San Diego-s, përfundoi me vota të barabarta 24 pro e 24 kundër.

Top Channel