Bushati anulon konferencën e shtypit

Në një njoftim të zëdhënësit të AMA-s mbrëmjen e së premtes bëhej me dije se, zonja Bushati do të dilte në një konferencë shtypi. Por paraditen e së shtunës, me sa duket ajo ndërroi mendje duke mos dalë vetë e kështu duke mos i dhënë  mundësi medias për t’i drejtuar pyetje.

“Në kushtet kur AMA ka ftuar televizionin Top-Channel për të marrë pjesë në proçedurën e garës “Beauty Contest”, kronikën e transmetuar dje nga ky televizion e konsiderojmë si presion të hapur ndaj një insitucioni të pavarur, për të mos kryer detyrat e tij ligjore”, deklaroi Fatbardh Zenelaj, drejtor për marrëdhëniet me publikun pranë AMA-s.

Top Channel sqaron zonjën Bushati dhe opinionin publik se në raportimet e tij nuk ka bërë gjë tjetër vetëm se i është përmbajtur misionit të informimit dhe respektimit të ligjit edhe nga AMA e vetë zonja Bushati.

Jo vetëm Top-Channel, por çdo media e ka për detyrë të ngrejë problematika apo t’i drejtojë pyetje titullarëve të institucioneve. Top-Channel ka denoncuar procesin antiligjor me vetëm 3 anëtarë që AMA po çon përpara, ndërkohë që liçencimi i rrjeteve kërkon një kuorum prej të paktën 5 anëtarësh.

Top Channel ka kërkuar nga zonja Bushati të bëjë publike dokumentin e rregullores me firmat e 5 anëtarëve. Nisur nga shqetësimi i fudit i zonjës Bushati, Top-Channel ka lexuar vetëm ligjin, të cilin zonja Bushati pretendon se po e zbaton.

Dhe rezulton që kryetarja e KKRT-së është në shkelje të tij. Prandaj e vlerësojmë të nxituar daljen në konferenca shtypi të AMA-s sa herë që TCH trajton probleme të medias elektronike në kronika televizive.

Por me sa duket zonja Bushati, e zënë ngushtë në këtë situatë, ku është duke shkelur ligjin, gjen si komardare shpëtimi atakimin e medias më të madhe në vend.

Në kronikën e së enjtes ne e pyetëm zonjën Endira Bushati përse nuk e bëri AMA strategjinë e dixhitalizimit siç e kërkon ligji 8410, por ministria e Genc Pollos? Ishte vetë zonja Bushati gjatë një seance dëgjimore në Parlament më 13 Shkurt 2012, që shprehu pakanaqësitë e saj pikërisht për strategjinë e transmetimve dixhitale.

“Me keqardhje konstatoj se vërejtja jonë kryesore nuk merret parasysh. Cila është ajo?  Ka një proces të miratimit të strategjisë për kalimin nga transmetimet analoge në transmetimet numerike. Ky projektligj, pavarësisht se nga anëtarët e grupit të punës është përpjekur të parashikojë disa nga alternativat, nëqoftëse miratohet siç është i tillë, ai ngelet i paaplikueshëm në praktikë dhe rrezikon të sjellë pasoja që zor se mund të jenë të ndrqëshme me amandimet e ndryshme që mund t’i bëhen pas miratimit të strategjisë. Prandaj, vërejtja jonë kryesore dhe propozimi ynë kryesor është që projektligji të mos miratohet në formën që është, por të bashkërendohet me miratimin e strategjisë në kalimin e transmetimeve dixhitale”, deklaroi atëherë Bushati.

Përse gjatë këtyre 3 viteve nuk është hartuar plani i caktimit të frekuencave, dokument bazë për liçencimin e rrjeteve numerike? Po ashtu e pyetëm, përse ajo është duke e nxituar në këtë proces kur nuk e ka kourumin e nevojshëm për realizimin e procesit të liçencimit të rrjeteve numerike? Sikurse i kemi kërkuar zyrtashisht të na vërë në dispozicion vendimin e miratimit të rregullores për këtë proces kaq të rëndësishëm, për të cilin ende nuk kemi marrë përgjigje.

Top Channel