Mediat greke për zgjedhjet

Me titullin “Kërkon ta bëjë Shqipërinë Europë” dhe një fotografi të kryesocialistit Rama, gazeta “To Ethnos” nis artikullin e saj duke theksuar se shqiptarët votuan rilindjen e tyre, duke zgjedhur Aleancën e Majtë.

Sipas gazetës, kryeministri Berisha pas 8 vitesh në pushtet dhe dy dekadash në qendër të politikës së vendit, pagoi tendencat autokratike të qeverisjes së tij, kryesisht duke marrë nën kontroll të tre pushtetet: ekzekutivin, legjislativin dhe gjyqësorin.

Në kontrast me të “plakurin” Berisha, shton gazeta, që i bën një portret mjaft lakues kryeministrit të ri shqiptar, 49-vjeçari Rama synon të vendosë Shqipërinë në një rrugë të re moderne europiane, duke pasur edhe si mësues para zgjedhjeve ish-kryeministrin britanik Tony Blair, të cilin do ta ketë edhe këshilltar kryesor pas fitores.

Edhe pro-qeveritarja “Kathimerini” thekson se zgjedhjet në Shqipëri nuk ishin vetëm një përzgjedhje e qytetarëve për një qeveri të re, por ato përbënin një sfidë shumë më komplekse dhe të rëndësishme, siç është perspektiva e anëtarësimit në BE.

Zoti Rama, sipas “Kathimerini”, erdhi në këto zgjedhje duke premtuar shërim për disa prej plagëve që torturojnë shqiptarët, siç janë: korrupsioni, papunësia, mungesa e institucioneve, mungesa e politikës sociale.

Për fitoren e madhe të socialistëve në Shqipëri shkruan edhe e majta “Avgji”, që i referohet rezultatit tepër domethënës që kanë arritur aleatët socialistë në këto zgjedhje pas tetë vjet qeverisjeje të konservatorëve shqiptarë.

Mediat greke kanë përmendur edhe bisedën telefonike në të cilën ish-kryeministrit grek Papandreu ka përgëzuar kryesocialistin Edi Rama si lideri i Internacionales Socialiste, një bisedë gjatë së cilës janë shkëmbyer mendime për zhvillimet në rajon, që do të jenë edhe pjesë e bisedimeve në takimin më të parë të tyre.

Top Channel