Cameron sulmon Brukselin
13/05/2013 16:00
Kryeministri gjeorgjian pezullon bisedimet e anëtarësimit në BE deri në fund të vitit 2028 28/11 22:56
I persekutuar nga probleme të brendshme, kryeministri britanik David Cameron përpiqet t’ia hedhë fajin Evropës, të cilën disa qytetarë britanikë dhe disa ministra të kabinetit të tij nuk e duan më.
Kështu, Cameron ka deklaruar se status kuoja sot në radhët e Bashkimit Evropian është e papranueshme dhe duhet ndryshuar sa më parë.
“Nuk besoj se status kuoja në BE është e pranueshme në ditët e sotme. Unë dua ta ndryshoj dhe sapo ta ndryshoj do t’u vendos përpara qytetarëve britanikë një zgjedhje të thjeshtë: brenda apo jashtë”, ka deklaruar Cameron.
Kryeministri ka ritheksuar kështu me forcë pozicionin dhe strategjinë e tij, që është rinegocimi i marrëdhënieve të Mbretërisë së Bashkuar me institucionet evropiane dhe ta zgjidhë problemin përmes një referendumi.
Deklaratën Cameron e ka bërë në Shtetet e Bashkuara, ndërkohë që në Britaninë e Madhe debati mbi Evropën sa vjen e bëhet më “i nxehtë”, pasi dy ministra kanë deklaruar se, nëse referendumi do të mbahej sot, ata do të votonin për daljen e Londrës nga Unioni.
“Nuk do ta mbajmë referendumin nesër. Referendumi do të mbahet para fundit të 2017-ës”, ka thënë më tej kryeministri, duke iu përgjigjur interesit të gazetarëve lidhur me deklaratat e dy ministrave të kabinetit të tij.
Top Channel
