Siri, lirohen katër gazetarë italianë

Lajmin e ka bërë të ditur vetë kryeministri italian Mario Monti, sipas të cilit katër reporterët janë liruar të shtunën dhe tashmë ndodhen në Turqi.

“Dëshiroj të falenderoj task forcën e Ministrisë së Jashtme dhe të gjitha strukturat e shtetit që me angazhimin e tyre bënë të mundur zgjidhjen e këtij problemi, të komplikuar nga rrezikshmëria e kontekstit”, ka deklaruar Monti.

Monti, që mbulon njëkohësisht postin e ministrit të Jashtëm, i ka shprehur mirënjohjen e tij edhe mediave, që me përgjegjësi aderuan në kërkesën e tij për t’u treguar të rezervuara, “duke kontribuar në zgjidhjen e çështjes”.

Të liruarit janë gazetari i Rai-t Amedeo Ricucci, fotografi Elio Colavolpe, dokumentaristi Andrea Vignali dhe reporterja e pavarur Susan Dabbous, me origjinë siriane.

Ata kishin hyrë në Sirinë e kontrolluar nga rebelët më 2 prill nga Turqia dhe në program kishin që të rihynin çdo mbrëmje në territorin turk, për të vendosur kontakte më Italinë.

Gjurmët e tyre u zhdukën më 4 prill, kur gjatë kohës së drekës ishte parashikuar një lidhje në Skype me disa kolegë në Romë.

Top Channel