Arrestohet ish-drejtori i bankës

Mënyra se si vepronte Genci Markollari, 37 vjeç, ishte se depozitonte në bankën qëndrore më pak para seç arkëtonin 5 biznesmenë në degën që drejtohej prej tij.

Për dy vite me radhë Markollari, duke u hequr një pjesë të vogël për çdo derdhje pesë bizneseve, dyshohet se i solli bankës së tij një dëm ekonomik prej 100 mijë eurosh.

“Forcat e policisë së Tiranës kanë arrestuar shtetasin Genci Markollari, vjeç 37, ish-drejtor pranë bankës “Intesa Sanpaolo”, në degën e Rinasit. 37-vjeçari ka punuar në këtë detyrë që prej tetorit të vitit 2004 deri në dhjetor të vitit 2012. Nga hetimet e kryera në kuadër të këtij proçedimi rezulton se ish-drejtori, duke shpërdoruar detyrën, ka tërhequr para kesh nga llogaritë e disa klienteve të kësaj banke duke bërë derdhje “virtuale” në këto llogari, gjë që i ka sjellë një dëm ekonomik kësaj banke të nivelit të dytë në shumën mbi 100.000 euro. Këtë veprimtari kriminale ai dyshohet se e ka bërë në bashkëpunim edhe me punonjës të tjerë, gjeneralitet e të cilëve nuk bëhen të ditur për arsye hetimi, dhe të shtrirë në një afat kohor mbi 2 vjet dhe në llogaritë e mbi 5 klientëve të kësaj banke”, deklaroi në një konferencë për shtyp zëdhënësja e policisë së Tiranës, Alma Katragjini.

Për Markollarin është ngritur akuza e “vjedhjes duke shpërdoruar detyrën” dhe “falsifikim nga personi që ka për detyrë lëshimin e dokumentave”.

Top Channel