Fule dhe Kukan, nesër në Tiranë

Fule dhe Kukan pritet të flasin para mediave, shoqërisë civile dhe biznesit, mbi aspektet e ndryshme të integrimit europian.

Sipas burimeve konfidenciale të TCH në Bruksel, idea fillestare e kësaj konference ka qenë që, përkrah komisionerit, në panel të ishin përfaqësues të qeverisë dhe të opozitës.

Të njëjtat burime konfirmojnë se qeveria shqiptare e ka refuzuar pjesëmarrjen, çfarë ka sjellë edhe ndryshimin e folësve dhe përfshirjen, në momentet e fundit, të Eduard Kukan.

Kjo vizitë ishte parashikuar vetëm për konferencën me qytetarët, shoqërinë civile dhe biznesin, si dhe për inaugurimin e faqes së internetit të Delegacionit të BE-së për integrimin.

Por, megjithëse nuk parashikohet që Fule dhe Kukan të takojnë udhëheqësit politikë në vend, pritet gjithsesi që ata të zhvillojnë takime të ndara në Tiranë, me ministren e Integrimit, Majlinda Bregu, në takimin dypalësh me qeverinë, dhe me kreun e Komisionit të Integrimit, Ditmir Bushatin, në takimin me opozitën.

Fokusi i bisedave pritet të jenë zgjedhjet e 23 qershorit, retorika nacionaliste dhe reformat për integrimin europian.

Përgatiti: Arta TOZAJ

Top Channel