Partia Socialiste ka reaguar ndaj deklaratës së Komisionit Qendror të Zgjedhjeve për shkelje të afatit të parashikuar nga neni 28 pika 1 dhe 2 e Kodit Zgjedhor, nen ky që rregullon ngritjen e Komisioneve të Zonave të Administrimit Zgjedhor, KZAZ-të.
PS e cilësoi deklaratën e KQZ-së tërësisht keqinformuese për publikun dhe që sipas saj tregon se sa e politizuar është administrata e këtij organi. Socialistët pretendojnë se kanë dorëzuar propozimet e tyre brenda afatit që ka qenë ora 14:00 e ditës së hënë.
“KQZ në një qendrim krejtësisht politik ka keqinformuar opinionin publik. Partia Socialiste i ka dorëzuar propozimet për anëtarë të KZAZ-ve brenda afatit ligjor dhe afati për dorëzimin e propozimeve për anëtarët ka qenë sot deri në orën 14:00”, thuhet në deklaratën e PS-së.
Selia Rozë akuzon Komisionin Qendror të Zgjedhjeve për qendrim krejtësisht politik dhe shpreh gatishmërinë për të përmbushur të gjitha kërkesat që burojnë nga Kodi Zgjedhor.
“Deklarata e këtij institucioni vërteton politizimin e administratës së këtij organi. Garantojmë të gjithë qytetarët për përmbushjen e të gjitha kërkesave të Kodit Zgjedhor”, thuhet në deklaratë.
Në bazë të Kodit Zgjedhor, të drejtën për të propozuar anëtarë të KZAZ-ve e kanë Partia Socialiste, Partia Demokratike, Lëvizja Socialiste për Integrim dhe Partia Bashkimi për të Drejtat e Njeriut. Në deklaratën e KQZ thuhet se përvec PS, të gjitha subjektet e tjera kanë dorëzuar në KQZ propozimet e tyre dhe i bëhet thirrje socialistëve që të dorëzojnë sa më parë propozimet e tyre për të nisur shqyrtimin për përputhshmërinë ligjore.
Top Channel
