Leo Messi, gjatë një eventi paraditen e sotme, deklaroi para mediave sportive spanjolle se fitorja në “Old Trafford” e Real Madrid ndaj Manchester United tregoi forcën e vërtetë të madrilenëve: “E pashë ndeshjen dhe Reali tregoi se sa i fortë është.” Më tej, ylli argjentinas preku edhe tema të tjera të aktualitetit.
Momenti aktual – Jemi të ndërgjegjshëm që duhet të japim më shumë. Vijmë nga disa humbje të rënda dhe duhet të ndryshojmë situatën në të cilën ndodhemi sa më shpejt. E dimë që ndeshja ndaj Milanit do të jetë kyçe.
Gjendja e tij shpirtërore – Nuk jam i trishtuar, por më vjen keq për humbjet e fundit. Nuk na pëlqen të humbasim ndeshje. Dua që të përmirësohem ditë pas dite dhe këtë gjë duan edhe shokët e skuadrës. Cdo vit kërkojmë të fitojmë trofe dhe kjo dëshirë që kemi të gjithë është çelësi i suksesit tonë.
Përmbysja e rezultatit ndaj Milanit – Shpresojmë ta kthejmë rezultatin. Do të jetë e vështirë, por jo e pamundur. Ashtu siç na mundën ata në fushën e tyre, mund t’i mundim ne në fushën tonë.
Cristiano Ronaldo – Gjithmonë e kam thënë: nuk luajmë për të treguar se kush është më i miri nga të dy, por luajmë për të mirën e skuadrës sonë.
Top Channel
