Mali, luftime të përgjakshme, 78 të vrarë

Franca ndërhyri muajin e kaluar për të ndihmuar ushtrinë maliane në zmbrapsjen e militantëve islamik, të cilët kishin pushtuar rajonet veriore të Malit, gjatë vitit 2012.

Mijëra ushtarë nga vendet afrikane janë zhvendosur gjithashtu në Mali, që prej asaj kohe. Përplasjet e fundit ndodhën në malet e Ifoghas, një rajon malor i braktisur në Kidal, pranë kufirit me Algjerinë.

Rebelët besohen të kenë kërkuar strehim si refugjatë, pasi u detyruan të largohen nga qendrat kryesore të banimit. 5 automjete të rebelëve janë shkatërruar gjatë luftimeve të ashpra, gjatë së premtes, bëri të ditur ushtria e Çadit.

Luftimet mes kryengritësve islamik dhe ushtarëve malianë, të mbështetur nga ushtarët francezë, kanë vazhduar gjithashtu edhe në qytetin qendror të Gao-s.

Të enjten, koalicioni tha se kishte rimarrë kontrollin e bashkisë së qytetit, e cila ishte pushtuar nga militantët një ditë më parë.

Në një ngjarje të veçuar, ushtria amerikane tha se kishte dërguar drone survejimi në Niger, për të mbledhur informacione mbi militantët islamikë, përgjatë kufirit të Malit dhe do t’i ndajnë këto informacione me ushtarët francezë.

SHBA bëri të ditur se një kontigjent i fuqishëm prej 100 anëtarësh ishin duke operuar dronët në bazën e tyre në Niger. Franca njoftoi se dëshiron të tërheqë 4000 ushtarët e saj nga ish-kolonia e tyre muajin e ardhshëm, duke dashur që misioni i udhëhequr nga vendet afrikane të kthehet në një mision paqeruajtës të OKB-së.

Top Channel