PS prezanton “Rilindjen Kombëtare”

Deputetët socialistë kanë premtuar rigjenerimin e sistemit arsimor, atij shëndetësor, të artit dhe kulturës. Gjithashtu, ata kanë dhënë garancinë e tyre se qeveria e re pas 23 qershorit do të luftojë krimin që ka marrë rrugët, krimin në familje, dhunën ndaj grave, etj.

Një tjetër pikë e prekur ka qenë taksimi, ku deputetët kanë premtuar heqjen e taksës së sheshtë dhe vendosjen e taksës progresiste që parashikon: kush fiton më pak paguan më pak dhe kush fiton më shumë paguan më shumë.

Një tjetër premtim ishte ai për ish-të përndjekurit, të cilët sipas socialistëve do të marrin rikompensimin dhe dëmshpërblimet. Vetë kryetari i Partisë Socialiste, Edi Rama, është shprehur i bindur se më 23 qershor qytetarët shqiptarë do të votojnë për vizionin e kësaj force politike.

“Ne do t’u japim përgjigje shumë çështjeve. Njerëzit e kanë të qartë se sot qeverisen mbrapsht. E dinë se korrupsioni është shtrirë thellë. E dinë se kryeministri do bëjë gjithçka për të qëndruar në pushtet. Ata e dinë që kjo është e keqe për ta dhe për Shqipërinë. Më 23 qershor qytetarët shqiptarë do të votojnë për vizionin tonë”, ka deklaruar Rama, i cili ua ka lënë më pas fjalën deputetëve të PS, të cilët kanë folur për çështje të caktuara.

Vasilika Hysi për rendin dhe sigurinë: “Krimi është rritur, s’ka kursyer as gratë e as fëmijët. Ne kemi nevojë të sigurojmë pronën dhe familjen. Krimi duhet dënuar dhe autorët duhen ndëshkuar rëndë. Shqipëria i ka ligjet, por ato nuk zbatohen. PS do marrë masa që askush të mos bjerë viktimë e krimit. Do përmirësojmë politikat ekonomike e sociale dhe sistemin e drejtësisë”.

Sajmir Tahiri për rendin dhe sigurinë: “Krimi është rritur 4-fish. Në 8 vjet qeverisje shqiptarët janë 4 herë më të rrezikuar. Shkak për këtë situatë janë varfëria dhe gropa e papunësisë, militantizmi dhe korrupsioni. Krimi komandon në rrugë dhe në zyrat e shtetit, ndërkohë që oficerët e ndershëm të policisë janë braktisur në rrugë. Pas 23 qershorit do të marrë fund epërsia e krimit. Në 300 ditët e para ne do rivendosim Policinë e Shtetit në krye të detyrës. Do kthejmë besimin e publikut tek Policia e Shtetit. Do rikthejmë strukturën demokratike në Policinë e Shtetit. Do përcaktojmë mirë përgjegjësitë për zinxhirin e komandës. Parimi 1 shtet 1 polici do jetë shtrati i koordinimit, në mënyrë që krimi të mos marrë rrugët. Nuk do ketë më lloj lloj policish, që në vitet e fundit janë vërsulur kundër njëra-tjetrës. Do rrisim rrogat e funksionarëve të policisë dhe do ndihmojmë familjet e policëve të vrarë”.  

Ledi Shamku për arsimin: “Shqipëria dhe arsimi qeverisen nga të paditurit. Situata mund të rregullohet vetëm përmes arsimit. Duhet të përballemi me këtë plagë të përhapur të shqiptarëve. Asnjë fëmijë nuk duhet lënë mënjanë. Nuk duhet të ketë asnjë fëmijë mënjanë për shkak të varfërisë. Nuk mund të jetë më arsimi sipas xhepit. Arsimi do të jetë sipas nevojës, meritës dhe talentit. Ne kemi planifikuar ngritjen e shkollave dhe do garantojmë transportin e fëmijëve që sot rrijnë jashtë shkollave. Ne do hartojmë tekste bashkëkohore, do zgjedhim mësues jomilitant dhe do ngremë universitete të akredituara. Situata e sotme e arsimit nuk është çështje buxheti, por mungese vullneti. Brenda mandatit tonë të parë do ta shpiem në 40 për qind pjesëmarrjen në shkolla”.

Milena Harito për teknologjinë dhe inovacionin: “Teknologjia e informacionit po ndryshon dita ditës metodën e punës. Në tregjet në zhvillim 27% e të punësuarve punojnë vetëm online. Tregu është shumë i qartë, po ashtu rruga ku do ecë bota. 80% e punëdhënsve në SHBA mendojnë se së shpejti puna do të jetë tërësisht virtuale. Në tregun tonë dominojnë diplomat e pavlera. Kemi ecur shumë ngadalë ndërkohë që bota ka vrapuar. Aksesi ndaj informacionit dhe aftësia për ta përdorur atë janë të dobëta. Ne do ta ndryshojmë këtë përmes projekteve vendore e ndërkombëtare. Nuk ka rëndëi nga sa poshtë ngjitesh, por nëse shkon në drejtimin e duhur. Ekzistojnë shumë projekte-pilot për zhvillimin e nxënësve dhe punës së mësuesve. Kjo është puna e së ardhmes”. 

Shëndetësia. Për shëndetësinë kanë folur mjekët, të cilët kanë paraqitur problemet që hasin në punën e përditshme dhe kushtet e vështira në të cilat ata bëjnë punën e tyre. Gjithashtu, studentë të Fakultetit të Mjekësisë kanë folur për problemet në proçesin mësimor dhe vështirësitë për të gjetur një vend pune për shkak të burokracive dhe nepotizmit. Nga ana e tyre, përfaqësuesit e PS kanë prezantuar planin e tyre për një sistem shëndetësor universal, që do t’u shërbejë të gjithë qytetarëve dhe që koston e tij do ta blejë shteti. Ata kanë dhënë garancinë e tyre se pas 23 qershorit shëndetësia nuk do të jetë më një sistem që do të varet nga xhepat e qytetarëve, por nga nevoja e tyre. Sipas PS, kontrolli shëndetësor për njerëzit në nevojë do të jetë falas dhe i përditshëm.

Fidel Ylli për sportin: “Sportisti sakrifikon që të bëhet kampion dhe ne duhet t’u krijojmë kushtet atyre. Programit tonë i janë bashkuar shumë sportistë që kanë lënë gjurmë. Prej më shumë se 1 vit e gjysmë jemi takuar me njerëz të sportit. Kemi marrë sugjerime nga sportistë, trajnerë, studentë e veteranë të tij. Ky është vetëm hapi i parë, sepse gara e vërtetë do të nisë pas 23 qershorit, kur këtë projekt ta vëmë në zbatim dhe t’i kthejmë sportit identitetin. Ndaj jemi këtu për të kërkuar besimin tuaj. Ne duam një mbështetje që kurrë nuk i është dhënë sportit. Duam kontributin e duhur. Janë vendime shumë të rëndësishme të marra nga PS dhe kryetari i saj Edi Rama. Sporti luan një rol të pazëvendësueshëm në shoqërinë tonë. Sporti forcon dhe edukon një brez të rinjsh, duke i mbajtur larg fenomeneve shqetësuese si alkooli, droga dhe kriminaliteti. Falë sportit ndryshon imazhi i vendit, prej tij vendosen urat lidhëse. Deri dje për mua plani i sportit ishte një ëndërr, prandaj kam marrë sugjerimet e aktorëve të tij, që në kushte të vështira mundohen të rrisin talentet e fëmijëve tanë. Ta rrisim dhe ta ngremë sportin në nivelet më të larta, pasi në këto 22 vjet demokraci politika s’e ka mbështetur atë. Ne duhet t’i lidhim me njëra-tjetrën sportin me politikën, një lidhje e fortë për ide, vizione dhe vendime të rëndësishme”.

Në fund të konferencës fjalën e ka marrë vetë kreu i PS, Edi Rama, i cili është fokusuar pikërisht tek sporti, duke bërë një premtim të veçantë, kthimin e Llotarisë Kombëtare tek sporti.

“Përmes Rilindjes ne do të japim vetëm kampionë. Dua të nënvizoj diçka për këta kampionë që janë këtu dhe për ata që kanë hartuar programin, se ne do ta kthejmë Llotarinë Kombëtare tek publiku për të financuar sportin, politikat rinore, artin dhe trashëgiminë kulturore. Përmes kthimit të Llotarisë Kombëtare ne do të mundësojmë rilindjen e sportit duke filluar nga shkollat, sepse ne duam të mbështesim çdo talent që nesër mund të ngrejë flamurin kombëtar. Por ne duam që përmes sportit të mbështesim vizionin tonë të bashkëjetesës qytetare, të paqes dhe shpirtit sportiv, që është kaq i domosdoshëm për shoqërinë. Jam besimplotë se 4 vjet më vonë ata që e kanë hartuar këtë program do të jenë shumë krenarë”, ka deklaruar Rama. 

Shahistja Rozana Gjergji për sportin: “Gjithë jetën ia kam dedikuar shahut. Vij nga një familje të përndjekurish dhe në këto 23 vite demokraci ajo nuk është trajtuar ashtu siç duhet. Madje, më keq se nga regjimi komunist. Nuk bëhet fjalë për investime, por kampionatet bëhen nën dritën e qirinjëve. Sportistët jo vetëm nuk shpërblehen, por nuk kanë mundësi të mbajnë formën e tyre. Gjithësesi, unë do vazhdoj të ngre flamurin shqiptar. Unë besoj se situata mund të ndryshojë. Sportistët janë njerëz të sakrificës. Është koha që sporti të fokusohet tek talentet dhe tek aftësitë”.

Peshngritësi Briken Cakja për sportin: “Peshngritja është sporti ku merren më shumë medalje në nivele evropiane dhe botërore. Kam punuar për të arritur nivele të larta, për të marrë medaljet, por kushtet kanë qenë mizerabël. Por pavarësisht kësaj, jam shpallur kampion Evrope dhe sportisti më i mirë për vitin 2012. Në Lojrat Olimpike u rendita në vendin e 9-të. I bashkohem këtij draft/programi sepse e ardhmja jonë varet nga kjo”.

Top Channel