Euro, në tryezën e G20-ës

Franca, në mënyrë të veçantë, druhet se në të ardhmen mund të shtrenjtohen eksportet në vendet, që përdorin monedha të tjera, e për këtë arsye ministri i  Financave, Pierre Moskovici, insiston të veprohet në mënyrë të koordinuar ndaj goditjeve të forta dhe që kursi i Euros të mos lihet vetëm në dorë të tregut.

Sipas Komisionerit të Çështjeve Monetare, Olli Rehn, sidomos vendet defiçitare të Europës Jugore vuajnë prej Euros së fortë.

Çështja e kursit të këmbimit të Euros mund të jetë, për këtë arsye, një nga pikat kryesore në axhendën e takimit të G20-ës, që zhvillohet këtë fundjavë në Moskë.

Monedha e përbashkët u forcua për të tretën ditë radhazi kundrejt dollarit amerikan.

Ekspertët thonë se oreksi i tregut për Euron është shtuar. Situata e eurozonës ka ardhur gradualisht në përmirësim, shpjegon Neil Jones, i “Mizuho Corporate Bank” në Londër, e bashkë me të edhe projeksionet për ekonominë globale.

Por, forcimi i tepërt i tij nuk i vjen për shtat bllokut. Japonia vendosi së fundi të zhvlerësojë Jenin, në mënyrë që të rrisë eksportet e saj, e pikërisht kjo lëvizje e Tokios detyroi Francën të kërkojë një debat mbi eksportet europiane.

“Vlera e Euros nuk është diskutuar në thellësi”, – thotë Parisi zyrtar, – “ndaj mendojmë se takimi i G20-ës do të ishte vendi i duhur për ta prekur më gjerësisht këtë temë. Olli Rehn, ndërkohë, kundërshtoi spekulimet rreth një falje borxhesh për Qipron, sipas shembullit të Greqisë.

Komisioneri i Çështjeve Monetare sqaroi, pas një takimi të ministrave të Financave të BE-së, se autoritetet në Bruksel nuk po punojnë për ndonjë pjesëmarrje të sektorit privat në një paketë shpëtimi për Qipron dhe se Greqia ishte një kandidat i veçantë dhe një rast i izoluar.

Top Channel