Kuçi: Ndarja apo statusi special s’diskutohen

“Statusi special dhe ndarja nuk janë tema në diskutim. Temë është zbatimi i plotë i sovranitetit edhe në atë pjesë të territorit tonë”, ka thënë zv/kryeministri Hajredin Kuçi.

Në një prononcim për ”Koha Ditore”, Kuçi ka saktësuar se në takimin e pestë, kryeministrat Thaçi dhe Daçiç do të bisedojnë për shpërbërjen e strukturave paralele të Serbisë në veriun e Kosovës.

Takimi i radhës i dialogut të ndërmjetësuar nga shefja e Politikës së Jashtme të BE, Catherine Ashton do të mbahet mes datave 19 dhe 21 shkurt.

Në një fjalim të mbajtur në fillim të muajit në Konferencën e Mynihut mbi Sigurinë, Ashton i cilësoi takimet e ardhshme kyçe për dialogun.

“Unë dua të çmoj trimërinë e atyre në Prishtinë dhe në Beograd që kanë lënë mënjanë historinë për t’u bashkuar. Por dua t’ju them të gjithëve se takimet e ardhshme do të jenë thelbësore”, iu drejtua Ashton të pranishmëve në konferencë.

Tema kryesore e këtij proçesi është veriu i Kosovës, çështje për të cilën të dy kryeministrat, Thaçi dhe Daçiç, janë angazhuar disa herë për ta zgjidhur.

Por zgjidhja duket se nuk do të jetë e lehtë për t’u arritur, pasi të dyja palët vështirë se do të lëvizin nga qëndrimet e tyre, Prishtina për largimin e strukturave dhe Beogradi për një autonomi.

Top Channel