Para samitit përfundimtar për buxhetin evropian të shtatë viteve të
ardhshme, Presidenti i BE-së Herman Van Rompuy ftoi krerët e shteteve
dhe qeverive të 27 vendeve anëtare që gjatë negociatave të vënë
interesin e përgjithshëm të Unionit para detajeve të vogla kombëtare.
“Bisedimet për buxhetin janë gjithnjë të vështira, të gjata dhe mund të duken rrëmujë nga jashtë, e ndonjëherë dhe nga brenda. Ndodh që kaq shumë përfshihemi në detaje të vogla gjatë negociatave saqë humbasin pamjen në tërësi, e cila nuk duhet humbur, pasi është ajo që ka me të vërtetë rëndësi”, tha Herman Van Rompuy, President i BE-së.
Punësimi i të rinjve është sfida dhe prioriteti kryesor i buxhetit të ardhshëm sipas Presidentit Van Rompuy. Së dyti buxheti evropian duhet të rrisë shpenzimet në fushën e kërkimit, inovacionit dhe edukimit. Dhe së fundmi duhet të jetë një buxhet që pasqyron përpjekjet e masave shtrënguese nga vendet anëtare.
Van Rompuy ftoi për gjetjen e kompromisit jo vetëm 27 vendet anëtare, por dhe Parlamentin Evropian i cili ka të drejtën e votës për miratimin e buxhetit të BE-së për shtatë vitet e ardhshme.
Top Channel
