Medvedev: Regjimi i al-Assad po shembet

Ky ishte vlerësimi që i bëri situatës në Siri kryeministri i Rusisë, Dmitry Medvedev, në një intervistë të transmetuar mbrëmjen e së dielës në rrjetin “CNN”.

Gjatë intervistës, Medvedev u tregua i kujdesshëm për të distancuar Moskën nga mbështetja e al-Assad, por theksoi se qëndrimi i Kremlinit ka qenë dhe mbetet se zgjidhja për Sirinë duhet të vijë nga brenda vendit.

”Ekziston një pikëpamje e gabuar se Federata Ruse është një aleat i pakushtëzuar e Sirisë së presidentit Bashar al-Assad. Ne kemi pasur marrëdhënie të mira me të dhe babain e tij (ish-presidenti i vendit), por ju siguroj se marrëdhëniet e Damaskut kanë qenë shumë më të ngushta me vendet e mëdha europiane”, deklaroi Medvedev.

”Ne asnjëherë nuk kemi thënë se qëllimi ynë në Siri është që të ruajmë këtë klasë drejtuese. Nuk është qëllimi i Rusisë që presidenti al-Assad të mbetet në pushtet. Nga ana tjetër, mbështesim që çdo vendim për të ardhmen e vendit të merret nga populli i Sirisë dhe jo nga kancelaritë e huaja. Në këtë pikëpamje, qëndrimi i Rusisë ka qenë i ngjashëm si në rastin e Libisë apo ndërhyrjeve në vendet e tjera, me ndërhyrjen e huaj që shpesh ka rezultuar problematike dhe e dëmshme për të ardhmen afatgjatë të vendeve”.

I pyetur për të një parashikim të mundshëm të fundit të luftës në Siri, Medvedev bëri një analizë realiste duke thënë se për momentin, diçka e tillë është e pamundur, por pranoi se çdo ditë luftimi më shumë, zbeh shanset e al-Assad për të drejtuar vendin pas mbylljes së këtij konflikti.

Lufta civile e nisur në mars 2011, i ka kushtuar jetën të paktën 60 mijë sirianëve sipas vlerësimeve të OKB-së, ndërsa të paktën katër milionë të tjerë kanë braktisur banesat për t’u zhvendosur si refugjatë në vendet fqinje apo në zona më të sigurta brenda vendit.

Top Channel