“Facebook” është pranë lëshimit të një motori të tij të kërkimit, raportuan mediat ndërkombëtare ditën e martë, duke paraprirë një lajmërim madhor që vetë kompania ka shpallur për mbrëmjen e 15 janarit prej disa ditësh.
Më parë ishte spekuluar se “Facebook” mund të ishte pranë prodhimit të një “smartphone”, që do të përfshinte në konkurrencë me gjigantët e “Apple” apo “Sony”, por burime pranë kompanisë spekuluan në mediat amerikane se rrjeti shoqëror ka ndërtuar një motor kërkimi të ngjashëm me atë të “Google”.
“Ndonëse është ende e paqartë se si do të funksionojë ky motor kërkimi, është paralajëmruar se “Facebook” do të bëjë këtë hap shumë shpejt dhe në orët në vazhdim pritet që rrjeti të shpallë zyrtarisht një luftë të ashpër ndaj “Google”, faqes më të klikuar në botë, kryesisht falë sistemit më të avancuar të kërkimit që përfshin”, shkruhej në uebsajtin “Pocket-lint”.
Aktualisht, “Facebook” përdor një sistem bazë kërkimi në faqen e tij, duke lejuar përdoruesit që të kërkojnë për të njohur, vende dhe objekte të ndryshme.
Megjithatë, besohet se mbrëmjen e së shtunës, rrjeti shoqëror më i përdorur në botë do të shpallë ngritjen e këtij motori kërkimi në një nivel të ri.
Top Channel
