Tjetër përdhunim në Indi

6 persona kanë përfunduar në pranga e një 17-vjeçar është shpallur në kërkim, lidhur me incidentin që vjen pikërisht në një kohë, kur mbarë vendi u përfshi nga protesta masive kundër dhunimit dhe vdekjes së një studenteje 23-vjeçare në kryeqytet.

Dinamikën e episodit të dytë e shpjegoi vetë viktima, identiteti i së cilës nuk është bërë i ditur.

“Shoferi i autobuzit refuzoi të më ndalonte në Gurdaspur e vazhdoi rrugën. I la të gjithë pasagjerët e tjerë të zbrisnin, përveç meje. Eci më tej dhe e ndaloi autobuzin në një vend të shkretë. Pas kësaj, ai dhe të tjerë abuzuan me mua”, u shpreh viktima e agresionit.

29-vjeçarja dridhej e gjitha, gjatë kohës që bënte këtë rrëfim. Incidenti ndodhi mbrëmjen e së premtes, kur kishte marrë autobuzin e po udhëtonte për në fshatin e saj, por me të mbërritur atje, siç shpjegoi dhe vetë, nuk e kanë lejuar të zbresë.

Me sa duket, as frika e ndëshkimit kapital, që pret 5 të akuzuarit për vdekjen e studentes në Delhi, nuk e ka frenuar përsëritjen e episodeve të tilla në Indi.

Protestat masive, që përfshinë vendin me atë rast, detyruan qeverinë të ngrinte gjykata të posaçme, të cilat do të merren ekskluzivisht me çështjet e përdhunimeve, ndërsa ligjvënësit po diskutojnë mundësinë e forcimit të ligjeve ndaj agresionit seksual.

Top Channel