Humbja e fundit ndaj Udinese ka nxjerrë në pah krizën që po kalon Interi edhe pse drejtuesit e klubit zikaltër nuk e pranojnë.
Disfata 3-0 në “Friuli” nuk ishte e rastësishme, por erdhi në një moment kur skuadra e Stramaccioni nuk luan dhe nuk shënon më. Pas triumfit në fushën e Juventusit (1-3), Inter ka grumbulluar vetëm 8 pikë në 8 ndeshje: 2 fitore, 2 barazime dhe 4 humbje.
Në transfertë, që pas suksesit ndaj bardhezinjve, 4 humbje radhazi. Duket se entuziazmi që përfshiu Interin pas fitores ndaj Juves i ka bërë dëm lojtarëve.
Magjia e Interit mbaroi në Torino. Që kur iu afrua Juventusit vetëm 2 pikë larg vendit të parë, skuadra e Stramaccioni ka humbur në transfertë ndaj Atalanta, Parma, Lazio dhe Udinese; ka barazuar ndaj Cagliari dhe Genoa në San Siro dhe ka fituar vetëm ndaj Napoli dhe Palermo po në fushën e tij.
Statistika që vlejnë për mesin e renditjes dhe jo për zonën Champions.
Top Channel
