Juve, Pirlo është “mbret” në Facebook

7 gola ka shënuar me Juventus, ka dhënë asiste gjeniale si dhe ajo penallti në formë parabole, e cila ëmbëlsoi natën mes 24 dhe 25 qershorit të italianëve. Për më shumë, kihet parasysh titulli kampion dhe Superkupa e Italisë, e të gjitha këto përbëjnë atë vit 2012, të magjishëm, për Pirlon. Këtë verdikt kanë dhënë tifozët, të cilët kanë votuar në sondazhin e faqes zyrtare të Serie A në rrjetin social Facebook.

Kanë shprehur preferencën e tyre gati 67 mijë persona: mesfushori juventin grumbulloi 13,292 vota. Kthesa e madhe, me pothuajse 1 gol për ndeshje që prej shtatorit, ka ngecur vetëm në hapat e fundit të “lavdisë” për sulmuesin e Milan-it (100 vota më pak), aktualisht golashënuesi më i mirë i Serie A. Në vendin e tretë, më i distancuar nga dy vendet e para, është klasifikuar Edinson Cavani, me 5,669 vota.

Në krahasim me “Faraonin”, duhet thënë se Pirlo e ka merituar këtë çmim simbolik pak më shumë, për shkak të vazhdimësisë së treguar. Andrea e mori mbi shpatulla Juventus-in edhe gjatë fazës së dytë të sezonit të kaluar, në luftën për titull, duke shënuar golin e parë bardhezi kundër Catania-s, teksa edhe sivjet e ka nisur fuqishëm, duke shënuar që ndaj Parma-s, përveç se ka fituar zemrat e tifozëve në “Juventus Stadium”, me pikën e tij më të fortë: asistet.

Gjatë vitit kalendarik 2012 numërohen plot 7 gola, shumica e të cilave kanë ardhur nga specialiteti i tij, goditjet e dënimit. I rëndësishëm në këtë votim ka qenë edhe Europiani, si dhe ajo penallti alla-Totti kundër Anglisë. Nëse verdikti i finales së Kievit do të kishte qenë ndryshe, ndoshta tani Pirlo do të ishte mes 3 të parëve pretendentë të “Topit të Artë”.

Top Channel