Raul Meireles, mesfushori i kombëtares së Portugalisë dhe ish-lojtar i Liverpool e Chelsea, është pezulluar për 11 ndeshje pasi ka pështyrë një arbitër në kampionatin turk të futbollit.
Sipas gazetës ‘Hurriyet’, lojtari i Fenerbahçe është ndëshkuar edhe me 8420 euro gjobë pasi ka bërë gjeste ofenduese ndaj gjyqtarit gjatë takimit Fenerbahçe-Gallatasaray të datës 16 dhjetor.
Meireles i mohon akuzat, sidomos atë të pështyrjes, dhe shton se gjesti i bërë prej tij nuk donte të tregonte se arbitri ishte homoseksual, por ishte një shenjë nervozizmi. Në Turqi, tifozët kanë zakon të shajnë “homoseksual” çdo arbitër që drejton ndeshjet e skuadrave të zemrës.
Fenerbahçe ka publikuar në faqen zyrtare në internet një komunikatë ku e vlerëson si të “padrejtë dhe të pabazë” dënimin që Komisioni i Disiplinës i Federatës Turke të Futbollit i ka dhënë futbollistit dhe shton se do e apelojë atë.
Top Channel
