Spanja: S’ndryshojmë qëndrim për Kosovën
15/12/2012 00:00
“NATO do të mbrojë Kosovën”, Vuçiç: “Të gjithë po përgatiten për luftë” 04/10 19:51
Funksionari i ambasadës së Spanjës në Beograd, Fransisco de Migel Alvares ka deklaruar se qeveria spanjolle nuk e pranon pavarësinë e shpallur në mënyrë “të njëanshme” të Kosovës.
I cituar nga mediat serbe, Alvares ka thënë se Madridi zyrtar nuk e njeh shtetin e Kosovës me kryeqytet Prishtinën, por ka nënvizuar se është gati të vendosë raporte që janë neutrale ndaj statusit.
“Spanja, duke qenë anëtare e BE-së, ndikon në proçesin e përmirësimit të situatës faktike në Kosovë, me qëllim përmirësimin e kushteve të jetesës atje”, ka thënë Alvares.
“Por, ashtu si dhe katër vendet e tjera, ajo nuk e njeh Kosovën si shtet dhe insiston që të gjitha marrëveshjet që arrihen në kuadër të BE-së të jenë neutrale ndaj statusit të saj”, ka vijuar ai.
Spanja, së bashku me Greqinë, Sllovakinë, Rumaninë dhe Qipron janë të vetmet vende të Bashkimit Evropian që nuk e kanë njohur ende pavarësinë e Kosovës, të shpallur më 17 shkurt të vitit 2008.
Top Channel
