Tensionet mbi sovranitetin mbi grupin e ishujve Senkaku (Diaoyu për kinezët) në Detin e Kinës mes Tokios dhe Pekinit mbeten gjithnjë të larta.
Tetë avionë luftarakë japonezë patrulluan hapësirën ajrore mbi ishujt e kontestuar pas marrjes së informacioneve se në këtë hapësirë po fluturonte një avion kinez.
Lajmi u njoftua nga zëdhënësi i qeverisë japoneze që shtoi se drejt Pekinit është nisur edhe një notë zyrtare proteste ndaj asaj që Tokio e quan “provokim dhe shkelje të rëndë të hapësirës së vet territoriale”.
Që prej muajit shtator, kur qeveria japoneze njoftoi blerjen e ishujve që zotëroheshin nga një familje japoneze, tensionet mes dy vendeve janë rritur ndjeshëm. Anije shtetërore kineze lundrojnë shpesh në këto ujëra, ndërsa Roja Bregdetare japoneze synon bllokimin e tyre.
E gjithë kjo është shndërruar në një lojë si macja me miun, shkruan CNN, që citon më pas Ministrin e Mbrojtjes të Japonisë, i cili ka thënë se rasti i regjistruar së fundmi, është shkelja e parë e hapësirës ajrore të vendit të tij.
Top Channel
