Itali, Napoletano “shtyn” krizën

Presidenti italian, Giorgio Napoletano ia doli mbanë të mbajë në këmbë qeverinë Monti, të paktën deri në muajin janar.

Kreu i shtetit italian u përfshi ditën e premte në bisedime të ethshme për përfaqësues të forcave politike parlamentare, që pasoi vendimin e partisë së Silvio Berlusconi-t, PDL për të mos mbështetur më qeverinë e Mario Montit.

Mësohet se në takime është folur edhe për hartimin e një rregulloreje të përhershme mbi masat anti-krizë të qeverisë Monti. Sipas mediave italiane, po diskutohet mundësia që disa prej këtyre masave që cilësohen si thelbësore për të nxjerrë vendin nga kriza financiare, të marrin statusin e paprekshmërisë për një periudhë të caktuar kohore për të mos rrezikuar që qeveria e ardhshme, kushdo qoftë ajo, të mos i hedhë poshtë.

Kjo kërkesë mësohet të jetë shtruar në dyert e Presidentit nga vetë kryeministri Monti me arsyetimin për të mos çuar dëm punën dhe mundin e arritur deri më tani nga qeveria e tij. Italia është në rrugë të mbarë, tha ai, ndaj duhet të vazhdojmë.

Italia është përfshirë në krizë politike, pak muaj nga zgjedhjet e përgjithshme parlamentare. Kjo pas deklaratës së ish-kryeministrit Silvio Berlusconi për rikandidimin e tij. Deklarata u pasua me një abstenim të deputetëve të partisë së tij në parlament kur në lojë ishte votëbesimi i qeverisë aktuale.

Top Channel