Edhe Franca si SHBA, thirrje ndaj Izraelit

Izraeli, tha shefi i diplomacisë franceze, duhet të abstenojë nga një vendim i tillë e të dëshmojë vullnetin e tij për rifillimin e negociatave.

“Një hap i tillë do të kishte pasoja vërtet të rënda. Ai do të përbënte një pengesë serioze për zgjidhjen përmes ekzistencës së dy shteteve sepse do të cënonte afërsinë territoriale të një shteti të ardhshëm palestinez e do të minonte besimin e nevojshëm për rifillimin e dialogut”, deklaroi Fabius.

Më herët, kritika në drejtim të Izraelit për synimet e tij lëshoi edhe Uashingtoni. Njoftimi i shtetit hebre se ka për qëllim të ndërtojë banesa të reja në zonat në fjalë erdhi menjëherë pasi Asambleja e Përgjithshme e OKB-së miratoi kërkesën e Autoritetit Palestinez për të ngritur statusin e saj në atë të një shteti jo-anëtar vëzhgues.

Por sekretarja Hillary Clinton reagoi duke thënë se administrata e Presidentit Obama, ashtu si dhe ajo përpara saj, ia ka bërë të qartë Izraelit se aktivitete të tilla i kthejnë prapa përpjekjet për vendosjen e paqes përmes bisedimeve. Sipas disa zyrtarëve izraelitë, që preferuan të ruajnë anonimatin, qeveria e kryeminsitrit Benjamin Netanjahu ka autorizuar planet për ndërtime të reja, si dhe për një krijimin e një zone paraprake punimesh në rajone të tjera të Bregut Perëndimor.

Ky veprim i Izraelit i ka zemëruar palestinezët që po festonin vendimin historik të Kombeve të Bashkuara.

Top Channel