Siri, “brutaliteti” ka shokuar Ban Ki-moon

Më shumë se 80 persona gjetën vdekjen në përplasjet në Siri, të premten, sipas burimeve të aktivistëve.

Shumë fluturime në ardhje apo në ikje nga kryeqyteti Damascus, u anuluan për të dytën ditë radhazi, pasi luftimet u përhapën shumë pranë aeroportit kryesor të vendit. Gjithsesi, stacioni televiziv shtetëror tha se disa fluturime të brendshme janë kryer.

Autostrada për në aeroport u rihap nga trupat qeveritare, pas luftimeve të ashpra, raporton korrespondenti i BBC-së nga Turqia.

Të premten, Ban Ki-moon paralajmëroi Asamblenë në New York, se civilët po masakroheshin pothuajse përditë kudo në Siri. “Shkeljet e të drejtave të njeriut janë duke u kryer në shkallë të gjerë nga të gjithë luftëtarët”, tha ai.

Ai parashikoi se rreth 4 milionë njerëz do të kenë nevojë për ndihma në dimër, për shkak të dhunës akoma e më brutale. Ai tha gjithashtu se “ndërtimi i një Sirie të lirë e demokratike do të kërkojë dialog politik dhe negociata”.

Fjalëve të tij u bëri jehonë i dërguari i OKB-së dhe Ligës Arabe për Sirinë, Lakhdar Brahimi, i cili u tha të pranishmëve në New York se Siria mund të bëhet një shtet i dështuar, për sa kohë që nuk do të gjehet një zgjidhje e negociuar politikisht për konfliktin.

Vetëm Këshilli i Sigurimit të OKB-së mund të vendosë një plan paqeje të qëndrueshëm, theksoi ai. Aktivistët thonë se më shumë se 40 mijë njerëz janë vrarë, që nga fillimi i kryengritjes ndaj presidentit Bashar al-Assad, në mars të 2011-s.

Top Channel