Koncert për 100-vjetorin

Petrit Malaj, rektori i Universitetit të Arteve, shprehet: “Kemi sjellë këtë koncert të madh festiv me rastin e 100-vjetorit të Pavarësisë. Jemi përpjekur që bërthama e këtij koncerti të jenë kompozitorët shqiptarë.”

Studentët e Fakultetit të Muzikës, së bashku me orkestrën “Ibrahim Madhi”, e cila përbëhet nga ish-studentë të këtij universiteti, Orkestrën Simfonike dhe korin, si dhe artistë e solistë të këtij institucioni, kanë performuar pjesët e përzgjedhura të shfaqjes.  

Sokol Shupo, drejtor artistik i koncertit dhe dekani i Fakultetit të Muzikës, tha: “Me këtë koncert pasqyrojmë edhe natyrën e institucionit tonë. Pjesa e parë përmban vepra të karakterit epik, ndërsa e dyta vepra që përcjellin karakteristikën e Akademisë së Arteve.”

Në repertorin e koncertit kanë spikatur vepra të kompozitorëve më të njohur shqiptarë si Avni Mula, Cesk Zadeja, Thoma Gaqi, Feim Ibrahimi etj. Mbrëmja festive përbën edhe një risi për këtë institucion, kur me rastin jubilar të 100-vjetorit të Pavarësisë, në skenë janë ngjitur së bashku studentë e pedagogë, duke sjellë kështu një prodhim artistik gjthëpërfshirës.

Top Channel