Thaçi takon opozitën kosovare

Thaçi mblodhi menjëherë edhe kabinetin qeveritar, për t’i informuar lidhur me takimin me Isa Mustafën dhe Blerim Shalën. Sipas kryeministrit Thaçi, Lëvizja Vetëvendosje, ndonëse ka qenë e ftuar, nuk ka marrë pjesë në takimin e përbashkët.

Ai tha se edhe Lëvizja Vetëvendosje ka qenë e ftuar, por ky subjekt politik ka refuzuar pjesëmarrjen.

“Unë sot kam informuar edhe ministrat e ambasadorët e vendeve të Bashkimit Europian për takimin që është zhvilluar. Faleminderit të gjithëve për mbështetjen e plotë dhe unike, dhe në të njëjtën kohë edhe liderët e përfaqësuesit e opozitës së Kosovës, pra atë të LDK-së dhe nënkryetarin e AAK-së, zotin Shala. Edhe spektri tjetër opozitar, i përfaqësuar në parlament, ka qenë i ftuar, por ka munguar përgjigja pozitive”, tha Hashim Thaçi, kryeministër i Kosovës.

Nga ana tjetër, zëvendëskryeministri Hajredin Kuçi bëri të ditur se kanë filluar takimet e grupeve teknike në terren, për implementimin e marrëveshjes së menaxhimit të integruar të kufirit mes Kosovës dhe Serbisë.

“Po, ka patur përfaqësues të palës së Kosovës, të EULEX-it dhe palës serbe”, tha Hajredin Kuçi, zëvendëskryeministër i Kosovës.

I pyetur për deklaratat e zyrtarit nga Beogradi, Aleksandër Vulin, se në veri mund të ketë trazira me rastin e zbatimit të IBM-it, Kuçi nuk ka dashur të komentojë, por  kritikoi Vulinin si person jo serioz në punë, duke i rekomanduar atij që të udhëheqë ndonjë Organizatë Jo qeveritare.

Top Channel