Berlusconi, gati për të karikuar Milan-in

Pikërisht në fund të ndeshjes, u përhapën zëra në “San Siro” për një vërejtje të ashpër të teknikut kuqezi kundrejt lojtarëve, por sot këto do të ishin fjalët ekzakte të një trajneri, i cili ndihet i tradhëtuar nga grupi.

Faktikisht, kur u mor vesh në mbrëmje për takimin mes Silvio Berlusconi-t dhe Adriano Galliani-t, i cili u mbajt në rrugën Vincento Monti, dukeshin pothuajse zero shanset e një rikonfirmimi të Allegri-t, pikërisht sepse herën e parë, gjatë këtij sezoni të trazuar, skuadra u shfaq sikur e kishte larguar teknikun, me një sjellje gjatë 45 minutave të para surprizuese, duke parë rëndësinë e takimit.

Atëherë, fakti që Silvio Berlusconi vendosi të konfirmonte trajnerin e tij duket tepër i kuptueshëm: mbi të gjitha mungesa e alternativave të vlefshme. Tassotti nuk do të mund t’i jepte goditjen e nevojshme lojtarëve, që u dukën të demotivuar, me përjashtim të disa rasteve në pjesën e parë.

Të gjesh trajnerë jashtë “familjes” nuk do të kishte garantuar, në këtë moment delikat, zgjidhjen e të gjitha problemeve, përveç se do të kishte rënduar bilancin me një tjetër pagë, veç asaj të Allegri-t, i cili ka një kontratë deri në qershor 2014.

Kështu që do të vazhdohet përpara me trajnerin livornez, i cili, sipas informacioneve, do t’i besojë një grupi prej 13-14 lojtarësh, që mund të ofrojnë një rendiment të sigurt në nivelin e zemrës dhe grintës, tepër të rëndësishme për të përballuar Napoli-n, Anderlecht-in, Juventus-in, Catania-n dhe Zenit-in, në 20 ditët e ardhshme.

Ndërkohë, rritet ankthi përpara vizitës së parashikuar të presidentit Berlusconi. Një situatë kaq të vështirë e kishte hasur vetëm pas humbjes me Cesena-n, më 8 janar 1989: shkoi në Milanello për të motivuar lojtarët, që reaguan duke mundur Como-n dhe vetëm pak muaj më vonë, arritën të fitonin Kupën e Kampionëve.

Top Channel