Dashurinë ndaj atdheut mund ta shprehësh në mënyra të ndryshme. Diedon Rexhepi është një 26-vjeçar i apasionuar pas figurave të shquara të historisë sonë.
Për këtë arsye ai ka zgjedhur suveniret dhe stampimet e imazheve të tyre si shenjë vlerësimi në 100 vjetorin e shpalljes së pavarësisë.
“Ideja më lindi sepse është viti jubilar i pavarësisë dhe ndonëse nuk është ndonjë biznes shumë fitimpruës, ishte një dëshirë e imja për të sjellë përpara bashkëkombasve disa figura që kanë të bëjnë me 100-vjetorin si Ismail Qemalin, Isa Boletinin, etj”, shprehet Rexhepi.
I diplomuar për drejtësi, Diedoni duket se nuk është frymëzuar nga ligjet dhe kushtetuta për të promovuar figura që rrallë i shohim nëpër dyqanet e suvenireve të prodhuara në Kinë.
“Unë fillimisht u frymëzova nga muzeu i Vlorës, ose ndryshe Shtëpia e Pavarësisë, aty ku është ngritur flamuri përpara 100 vitesh”, shprehet i riu.
Megjithëse jemi një muaj larg datës historike të 28 nëntorit, interesi i njerëzve për këto objekte është shumë i vogël. Kjo ndoshta është e lidhur edhe me mungesën e atmosferës festive në të gjithë vendin. Në këndin e këtij artisiti amator nuk mungon akti i shpalljes së pavarësisë.
“Ky është dokumenti i shpalljes së pavarësisë së Shqipërisë, së shkruar nga Luigj Gurakuqi, me shqipe dhe gjuhën otomane, e poshtë vjen shkrimi i delegatëve të Kuvendit. Unë e kam stampuar, është kopie nga origjinale që e sigurova nëpërmjet shoqërisë sime”, thotë Diedoni.
Ndërkohë nuk mungojnë edhe aksesorët e ndryshëm për telefonat celularë, siç janë koverat me flamurin kuq e zi, por Diedoni tregon se flamuj të tjerë janë më të preferuar nga shqiptarët.
“Më vjen keq që ky kover nuk është shumë i preferuar në Shqipëri. Shqiptarët që jetojnë jashtë e pëlqejnë dhe jam i kënaqur me vlerësimin e tyre. Por, me keqardhje, flamuri më i shitur është ai i Britanisë së Madhe dhe i Italisë”, përfundon 26-vjeçari.
Top Channel
