Kore, ushtari verior dezerton në Jug

Ushtari deklaroi se kishte qëlluar për vdekje dy oficerë përpara se të kalonte kufirin pak pas mesnatës mes së premtes dhe së shtunës.

Korrespondenti i BBC raporton se dezertimet përmes kufirit tokësor janë të rralla dhe se rasti i fundit i një ushtari daton në vitin 2010.

Mbi 20 mijë koreano-veriorë kanë emigruar në Jug në 60 vitet e fundit, shumica e të cilëve përmes Kinës dhe Azisë Jug-Lindore.

Teknikisht dy vendet janë ende në luftë që pas konfliktit të viteve 1950-53, që përfundoi me një armëpushim dhe jo me një traktat paqeje.

Ushtari citohet të ketë thënë se qëlloi komandantët e skuadrës së tij teksa ndodhej në detyrë.

Ndërsa një zyrtar i Ministrisë së Mbrojtjes së Seulit tha se gjashtë të shtëna ishin dëgjuar dhe se ushtarët-roje panë ushtarin të kalonte vijën e demarkacionit në një seksion perëndimor të kufirit të mbikëqyrur rreptësisht.

Ata përdorën altoparlantë për të kontaktuar me të dhe për të kuptuar që ai donte të dezertonte dhe e udhëhoqën drejt një zone të sigurtë, saktësoi zyrtari.

I njëjti burim shtoi më tej se aktualisht ushtari dezertor ndodhet në një lokalitet të mbrojtur ku dhe po merret në pyetje.

Top Channel