Kriza, guvernatorët mblidhen në Kosovë

Në hapje të kësaj konference ndërkombëtare, ministri i Financave, Bedri Hamza tha se janë bërë investime në shumë fusha dhe se do të vazhdohet edhe me privatizimin e ndërmarrjeve publike e shoqërore.

“Në mënyrë që të përmirësojmë produktivitetin dhe të rrisim pjesëmarrjen e sektorit privat në ekonomi, institucionet tona kanë vazhduar me proçesin e privatizimit të ndërmarrjeve shoqërore dhe publike dhe ky proçes do të vazhdojë edhe më tutje duke tërhequr edhe investitorë nga vendet e zhvilluara”, deklaroi Hamza.

Duke folur për krizën në Eurozonë, Hamza tha se përkundër zhvillimeve, sistemi bankar në Kosovë ka vazhduar me aktivitetin e tij, duke qenë mbështetës mjaft serioz i rritjes ekonomike të Kosovës, gjë që u mbështet edhe nga deklaratatat e guvernatorut të BQK, Gani Gërguri.

“Ne sapo kemi përfunduar programin e vlerësimit të sektorit financiar nga BB dhe FMN. Vlerësimet, rezultatet dhe konkludimet e përgjithshme janë pozitive nga ky proçes. Unë besoj thellë se ekonomia e Kosovës sapo ka filluar të vjelë benefitet e sistemit tonë bankar të zhvilluar. Natyrisht, në çdo rritje e zhvillim ka edhe sfida të reja. Jemi të përgatitur që t’iu përgjigjemi këtyre sfidave”, theksoi Gërguri.

Për rritje ekonimike foli edhe guvernatori i Bankës së Shqipërisë, Ardian Fullani, i cili tha se ekonomia shqiptare është duke u përballuar gjithnjë e më shumë me këtë sfidë, e cila zhvillohet në kushtet e një stabiliteti të konsoliduar makro-ekonomik dhe në prani të themeleve të shëndosha financiare, ku kërkesa agregate ka qenë e zbehtë gjatë 9 muajve të parë të këtij viti.

“Në kontekstin e brendshëm ekonomia sa vjen e përballet me një nivel relativisht të ulët konsumi dhe investimesh private, si dhe me një stimul të munguar të sektorit publik si pasojë e orientiimit në rritje të politikës fiskale dhe të ruajtjes së qëndrueshëmërisë afatgjatë të borxhit publik. Sistemi bankar dhe financiar mbeten të shendetshëm, likuid dhe njëkohësisht treguesit e kapitalit paraqiten në nivel relativisht të kënaqshëm”, nënvizoi Fullani.

Të pranishëm në këtë konferencë ishin edhe guvernatorët e bankave qendrore të Turqisë, Malit të Zi dhe Maqedonisë, të cilët shfaqën para të pranishëmve se si janë përballur me krizën ekonomike.

Top Channel