Sekiraqa bashkëpunëtor i drejtësisë?

Kështu njofton e përditshmja kosovare “Koha Ditore”, sipas të cilës Sekiraqa do të rrëfejë për veprimtaritë kriminale që zhvillohen në Kosovë.

Për këtë arsye, sqaron burimi, ai po trajtohet si bashkëpunëtor nga autoritetet e EULEX-it dhe aktualisht ndodhet në seksionin e rezervuar për këtë kategori në burgun e Dubravës.

Ndërkohë, autoritetet e Policisë së Kosovës nuk janë në dijeni të këtyre zhvillimeve, të cilat po drejtohen nga një prokuror i misionit evropian për rendin dhe ligjin.

Burime brenda proçesit kanë thënë se Sekiraqa ka informacione në mënyrë të veçantë për Policinë e Kosovës dhe për përvojën e tij si i burgosur në një kamp të UÇK-së.

Ditën e premte, pas orës 15:00, Sekiraqa u vetëdorëzua në policinë e EULEX-it. Vetëm pak më vonë zëdhënësi i misionit, Blerim Krasniqi konfirmoi zyrtarisht lajmin.

“Enver Sekiraqa është vetëdorëzuar tek policia evropiane e cila dhe e ka arrestuar. Pritet që ai të merret në pyetje nga një prokuror i Prokurorisë Speciale”, tha Krasniqi.

Enver Sekiraqa akuzohet për vrasjen e policit të Njësisë Speciale, Triumf Riza, por edhe për vepra të tjera penale.

Më herët për vendodhjen e tij ka pasur njoftime se ai ishte në Republikën e Irlandës, ndërkohë që pak ditë para dorëzimit dështoi një aksion i policisë për ta arrestuar atë në Prishtinë.

Gjatë ditës së premte u raportua gjithashtu se policia arrestoi Agron Eminin dhe Shpend Bobajn, dy persona nga klani i Enver Sekiraqës.

Këta dy të dyshuar ishin autorët e plagosjes që ndodhi ditë më parë afër kinemasë “ABC” në Prishtinë, ku mbeti i plagosur shtetasi Fisnik Vitija.

Top Channel