“Mbrëmje magjike” për dyshen Roshi-Kapllani

Pas një sezoni të vështirë tek Këlni, Roshi tregoi se kalimi në skuadrën e dytë të Frankfurtit ishte zgjedhja e duhur për të, me vlonjatin që ka fituar vendin e titulluarit dhe po fiton shumë më tepër minuta në kategorinë inferiore.

Mesfushori i grumbulluar rregullisht nga De Biasi realizoi në minutën e shtatë, duke i dhënë avantazhin të tijëve përballë 20 mijë tifozësh vendas.

Pas barazimit në fillimin e pjesës së dytë, një veteram i kombëtares si Edmond Kapllani realizoi mjeshtërisht edhe golin e fitores për bluzinjtë.

Të dy shqiptarët u zëvendësuan mes duartrokitjeve në fundin e pjesës së dytë.

Me këtë fitore, të ardhur në javën e gjashtë të Bundesligës 2, FSV-ja vazhdon të befasojë kritikët, duke u renditur në vendin e dytë dhe duke qenë në garë për të siguruar ngjitjen në Bundesligë, pavarësisht se nuk përfshihet në listën e favoritëve.

Ironikisht, Këlni, skuadra që nuk besoi në cilësitë e Roshit, ka bërë një fillim katastrofik të këtij kampionati, duke u renditur e parafundit me vetëm dy pikë në gjashtë ndeshje.

Top Channel