“E ashtuquajtura “Pranvera arabe” solli vetëm kaos dhe rebelët në Siri nuk do të mund të fitojnë kurrë”. Kështu e cilëson presidenti sirian, Bashar al-Assad revoltën që përfshiu vendet e Lindjes së Mesme dhe Afrikën e Veriut e së fundmi është ulur këmbëkryq në oborrin e tij.
Në një intervistë të rrallë për revistën egjiptiane, al-Ahram al-Arabi presidenti sirian shtoi se dialogu ishte mundësia e vetme e zgjidhjes së krizave në të gjitha vendet ku pati revolta popullore dhe se dhuna duhej shmangur.
Ai këmbënguli se qeveria e tij, përkundër rasteve në Libi, Tunizi, Egjipt, Algjeri e Jemen nuk do të bjerë. Ndryshimi nuk mund të ndodhë me ndërhyrjet ndërkombëtare, tha Assad, duke shtuar se të dyja palët e përfshira tashmë prej muajsh në një konflikt të ashpër e të armatosur në Siri janë të barabarta, por sërish fajësoi “terroristët” për viktimat.
“Dhuna nuk mund të tolerohet dhe qeveria nuk mund të qendrojë duarlidhur përballë akteve vandale të terroristëve. Dialogu është zgjidhja e vetme”, thotë presidenti sirian.
Prej kohësh Assad kishte shmangur daljet në publik. Megjithatë intervista e fundit e tij, analizon BBC, tregon se nuk ka asnjë ndryshim në qendrimet e tij për protestat në Siri, ku konflikti i armatosur ka marrë përmasat e një lufte civile duke u marrë jetën mbi 20 mijë personave që nga nisja e tij.
Top Channel
