Daçiç: Jo politikës së kursimit në Serbi

Gjatë Forumit të Manaxhimit Ekonomik të Europës Juglindore, të mbajtur në Beograd, Daçiç tha se e vetmja “zgjidhje për qeverinë e tij është ajo e krijimit të një cikli të ri investimesh, të cilët do të rindezin motorin e ekonomisë serbe”.

“Me paga dhe pensione të ulta si ato në Serbi, është shumë e vështirë që të realizosh një politikë kursimesh dhe shkurtimesh. Për më tepër, është e pamundur të gjesh një model ekonomik në ndonjë shtet tjetër apo në të kaluarën që të portretizojë si duhet situatën në të cilën ndodhemi”, u shpreh Daçiç.

“Mbi gjysmë milionë pensionistësh paguhen vetëm 120-130 euro në muajë (15 mijë dinarë), një milionë prej tyre rreth 160-170 euro. Ulja e pensioneve do të ishte një terapi për vdekjen e pacientit, asgjë tjetër”.

Në fjalimin e tij, kryeministri theksoi se avantazhet e ekonomisë serbe janë bujqësia, industria ushqimore dhe energjia, duke theksuar se investimet e reja duhet të fokusohen në këto sektorë.

Duke shpjeguar krizën e financave serbe, Daçiç shtoi se në vitin e shkuar, bankat e huaja tërhoqën 1,5 miliardë euro nga bankat serbe, çka nuk është e paligjishme, por që ngre pyetje në lidhje me përgjegjësinë sociale.

Top Channel