Grupe kriminale serbe kanë sulmuar të premten dy automjete, një të Policisë së Kosovës dhe një tjetër të EULEX-it, teksa po patrullonin në fshatin Varage afër Zubin Potokut.
Një pjesëtare e Policisë së Kosovës, e përkatësisë etnike serbe që ndodhej në automjet, ka pësuar lëndime por është jashtë rrezikut për jetën.
EULEX-i ka konfirmuar se një patrullë e policisë u sulmua nga grup personash të armatosur, të ciliët u shfaqën në rrugën mes Zupçit dhe Zubin Potokut, duke hapur zjarr kundër dy automjeteve.
Ende nuk dihen autorët e ngjarjes, megjithatë sipas EULEX-it dhe Policisë së Kosovës, hetimet po vazhdojnë. Kjo ngjarje ka nxitur reagimet ndërkombëtare dhe vendase.
Shefi i EULEX-it, Xavier de Marnhac dhe përfaqësuesi i posaçëm i BE-së, Samuel Zhbogar dënuan fuqishëm incidentin. Të njëjtën gjë bëri edhe qeveria.
“Sulmi i sotëm me armë zjarri ndaj policisë dhe ndaj përfaqësuesve të EULEX-it, dëshmon edhe njëherë se krimi dhe mungesa e sundimit të ligjit në veri kërkon mobilizim për trajtim nga institucionet lokale dhe ndërkombëtare në Kosovë”, thuhet në një reagim të zyrës së Kryeministrisë.
Qeveria u bëri thirrje institucioneve të drejtësisë për angazhim në zbardhjen e rastit, kapjen dhe sjelljen para drejtësisë të aktorëve të këtij “akti terrorist”.
Nga ana tjetër, gjatë ditës Policia e Kosovës, duke respektuar vendimin e qeverisë, dëboi nga territori i Republikës Aleksandër Vulin, shefi i Zyrës për Kosovën në qeverinë e Serbisë. Me urdhër të qeverisë kosovare policia i ndërpreu vizitën zyrtarit serb.
Top Channel
