“Talebani Amerikan” proteston në gjyq

Lindh i është bashkuar një nisme ligjore të dy të burgosurve të tjerë myslimanë, ndaj një vendimi i cili u ndalon atyre të bëjnë lutje në burgun federal në Indiana.

I riu 31-vjeçar është një nga 24 myslimanët e dënuar në këtë burg dhe po shlyen dënimin me 20 vjet për faktin se ka ndihmuar talebanët. Ai u arrestua në nëntor të vitit 2001.

Drejtori i burgut u ndaloi të burgosurve të luteshin, përveç ditës së premte dhe gjatë muajit të shenjtë të Ramazanit, pasi të dënuarit bënë një lutje duke injoruar alarmin për zjarr në vitin 2007. Gjithashtu, atyre u është ndaluar mbledhja me grupe të tjera besimtarësh.

Lindh, që nga mediat u pagëzua me emrin “Talebani Amerikan”, dëshmoi të hënën në një gjykatë të Indianapolisit, duke thënë se politika e ndjekur nga drejtuesit e burgut po shkelte të drejtën e tij të shprehjes.

I veshur me një uniformë burgu dhe një kapele të bardhë myslimane, ai tha gjithashtu se mësimet e Islamit i kërkojnë grupit ku ai bën pjesë që të luten deri në pesë herë në ditë.

“Besoj se është e detyrueshme. Nëse të kërkohet ta bësh në grup dhe nuk e bën, atëherë bën një mëkat. Nuk ka asnjë rrezik nga lutja në grup. Kjo është tërësisht absurde”, tha Lindh.

Top Channel