Francë, proces gjyqësor ndaj Ribery-Benzema

Një prokuror në Paris theksoi se ata duhet të gjykohen së bashku me shtatë persona të tjerë, në skandalin e bërë publik pak përpara pjesëmarrjes së skuadrës në Botërorin e 2010-s.

Të dy futbollistët mohojnë akuzat, ndërsa prostituta e përfshirë, Zahia Dehar, ka pranuar se nuk i kishte thënë futbollistëve se ajo ishte 16 vjeç kur u njoh me ta.

Në një deklaratë, skuadra e Ribery, Bayern Munchen, ka shprehur se i jep të gjithë përkrahjen dhe mbështetin e tij futbollistit.

Avokatja e mesfushorit, Sophie Bottai, deklaroi në “Agence France Presse” se ishte e “befasuar nga vendimi i gjykatës për të nisur një proces”, sidomos pasi një gjykatës i mëparshëm nuk kishte vlerësuar provat si të mjaftueshme për të ngarkuar dy yjet e futbollit francez me akuza.

Marrëdhëniet seksuale me minorene (15-18 vjeç), dënohen në Francë si një vepër penale, deri në tre vjet heqje lirie apo një gjobë maksimale prej 45 mijë eurosh.

Përfaqësuesja ligjore e Karim Benzema, sulmuesit të Realit të Madridit, theksoi se klienti i saj ishte i pafajshëm dhe se do të jepte për këtë shpjegimet e tij përpara një gjykate.

Top Channel