Siri, 45 kufoma në një park të Alepos

Lajmin e bën të ditur rrjeti i aktivistëve anti-regjim në Alepo, sipas të cilit trupat janë gjetur në parkun publik pranë xhamisë së Kaled ben Ualid.

Për momentin nuk ka informacione mbi identitetin e viktimave dhe mbi rrethanat e vrasjes së tyre dhe lajmi i publikuar nga aktivistët nuk mund të verifikohet në rrugë të pavarur.

Ndërkohë, vihet re një numër në rritje i sirianëve që arratisen nga luftimet dhe kërkojnë strehim në vendet fqinje. Këtë javë, të gjitha zyrat e UNHCR-së në Liban, Turqi, Jordani dhe Irak kanë sinjalizuar një rritje të refugjatëve.

Deri dje, një total prej 146.667 personash të arratisur nga Siria është regjistruar nga agjencia e OKB-së për asistencën ndaj refugjatëve.

“E dimë që në vende të ndryshme shumë refugjatë nuk janë regjistruar ende”, ka deklaruar në Gjenevë një zëdhënëse e organizatës humanitare.

Ndërkohë, Shtetet e Bashkuara po bëhen gati të njoftojnë në ditët e ardhshme sanksione të reja ndaj regjimit sirian të presidentit Bashar al Assad.

Lajmin e ka bërë të ditur të premten në Akra të Ganës, një zyrtar i Departamentit amerikan të Shtetit, në kuadër të vizitës së sekretares Hillary Clinton.

“Një nga format kryesore të presionit janë sanksionet ekonomike, të cilave në ditët e ardhshme do t’u shtohen sanksione të reja ndaj institucioneve siriane dhe mbështetësve të regjimit”, ka deklaruar burimi.

Top Channel