Japoni, përkujtohet tragjedia e Hiroshimës

Me dhjetëra mijëra persona ishin të pranishëm në ceremoni, ndërsa debati dhe ndienjat anti-bërthamore në vend kanë arritur nivelet më të larta në dekada.

Një këmbanë shënoi heshtjen prej një minute në orën 08:15, kur bombarduesi amerikan “Enola Gay” lëshoi bombën që shkatërroi krejtësisht qytetin dhe vrau 140 mijë persona.

Kryebashkiaku i Hiroshimës, Kazumi Matsui, lëshoi një apel për një planet të çliruar nga ankthi i armëve bërthamore, nga vendi ekzakt ku bomba amerikane preku tokën në 6 gusht 1945.

”I kërkoj qeverisë sime që të vendosë sa më shpejt një politikë energjie që të vendosë në radhë të parë sigurinë dhe shqetësimin për mirëqënien e qytetarëve”, deklaroi ai.

Matsui, njëkohësisht kërkoi më shumë mbështetje për të mbijetuarit e moshuar, që po përballen me ndërlikime shëndetësore të shkaktuara nga rrezatimet e bombës bërthamore.

Kryeministri Yoshihiko Noda, i pranishëm në ceremoni, theksoi se leksioni i Hiroshimës nuk duhet të harrohet kurrë, por nuk u shpreh mbi politikën nukleare të vendit të tij.

Pas krizës së Fukushimës, shkaktuar në 2011 nga një tërmet madhore që krijoi rrjedhje radioaktive dhe rrezatime nga një qendër e prodhimit të energjisë, ka pasur thirrje të fuqishme të shoqërisë civile që të hiqet dorë nga kjo formë e prodhimit të energjisë.

Megjithatë, Tokio zyrtar vendosi për rikthimin e plotë në punë të të gjithë reaktorëve në muajin korrik, duke argumentuar se kostoja e mbajtjes së tyre mbyllur do të ishte shumë e rëndë për të gjithë ekonominë.

Top Channel