Autoritetet afgane deklarojnë se tetë rebelë të cilët dyshohet se po planifikonin sulme në qendër të Kabulit janë vrarë në një betejë me forcat e sigurisë.
Këto të fundit bastisën shtëpinë ku ata ishin strehuar, në lindje të qytetit, dhe luftimet shpërthyen në orët e para të mëngjesit të së enjtes.
Beteja zgjati për gjashtë orë. Dhjetra shtëpi u evakuan dhe automjete që përmbanin sasi eksplozivi u gjetën në vendin e ngjarjes.
Operacioni i forcave të sigurisë u krye pas marrjes së një informacioni, kanë bërë të ditur autoritetet lokale.
Të njëjtat burime thonë se tre automjete të mbushura me eksploziv u janë sekuestruar rebelëve, të cilët ishin të pajisur edhe me jelekë vetëvrasës e armë të tjera.
Tre rebelë, me telekomanda kontrolli dhe udhëzime për sulme të sofistikuara në zona të ndryshme të qytetit u arrestuan gjatë natës në Kabul, ka deklaruar shefi i policisë së kryeqytetit, gjenerali Mohammad Ayub Salangi për BBC.
“Ky ishte një plan i madh, falë Zotit arritëm ta ndalnim”, ka deklaruar ndërkohë zëdhënësi i agjencisë së inteligjencës Latifullah Mashal për “Associated Press”.
Ndërkohë, guerrilasit talebanë kanë mohuar përfshirjen e militantëve të tyre në këtë atentat që mund të kishte marrë shumë jetë njerëzish të pafajshëm.
Top Channel
