Energjia elektrike është rikthyer pas një terri prej dy ditësh që përfshiu pjesën më të madhe të Indisë. Më shumë se 600 milionë persona u prekën nga “black-out” i shkaktuar nga rënia e tre rrjeteve elektrike.
Tashmë, sipas BBC, kaosit që shkaktoi errësira ku u zhytën shumë qytete indiane i ka ardhur fundi. Shefi i Korporatës Elektroenergjitike indiane, SK Soone, theksoi se energjia është rikthyer në 20 nga 28 shtetet indiane që ishin prekur nga defekti i madh.
Mungesa e energjisë elektrike shkaktoi probleme me transportin publik dhe ndërprerje të furnizimit me ujë. Në lindje të Indisë, rreth 200 minatorë u bllokuan nëntokë për shkak se ashensorët nuk punonin. Sipas zyrtarëve, këta minatorë tashmë janë shëndoshë e mirë.
Në një deklaratë të bërë në televizionin shtetëror të martën paradite, Ministri i Energjitikës Sushil Kumar Shinde fajësoi për këtë krizë vetë shtetet indiane të cilat, sipas tij, marrin më shumë energji nga rrjetet se sa u takon.
“U kam bërë apel të gjithë shteteve që të ndalojnë këtë gjë dhe u kam dhënë urdhër zyrtarëve të dënojnë shtetet që kanë shkaktuar këtë krizë energjitike”, u shpreh Shinde.
Top Channel
